Nŋɩnɩ gɛ Ʋsɔɔ dɛɛ tɩndɩnaa Ibraahiim, Muusa, Ɩsa na Muhammad (Ʋsɔɔ dɛɛ sɛɛdɩ na alafɩya ɩtala bɔrɔɔzɩ) bɛɛ zɛɛ ʋsɔɔ?
Abo Karim El-Marakshy

---

Download Now

➟ Translation of this material into other languages
➟ All the materials that are available in Tem-Kotokoli language
➟ All the materials that are available for Abo Karim El-Marakshy

Nŋɩnɩ gɛ Ʋsɔɔ dɛɛ tɩndɩnaa Ibraahiim, Muusa, Ɩsa na Muhammad (Ʋsɔɔ dɛɛ sɛɛdɩ na alafɩya ɩtala bɔrɔɔzɩ)  bɛɛ zɛɛ ʋsɔɔ?

Saatɩ nakʋrʋ kʋbɔnʋ malʋwa waazu ndʋʋ Ahmad Diidaat wɔɔ gɔgɔnɩ Saʋdiya ce na, waa la ɖaa faawɩɩ nakʋrʋ.

kʋbɔnʋ Ahmad Diidaat wee veeri ɖaa sɩsɩ bɩlɛ gɛ ʋmʋ waa zɩm ɩlaazɩ cɔɔcɩ dɩnaa na yahuuɖu wa nabɛrɛ  jingiri nakʋrʋ ndaa Durban, Afrique du Sud laadɔɔ ndaa mbɩlɛ. Baadala sɩ basʋʋ jingiri daa na, kʋbɔnʋ Ahmad Diidaat wɛɛ gbɛɛ ɩdakamwa ŋgɛ wee veeri wɛ sɩsɩ bɛmbɛ ɖʋɖɔ bala bɩlɛ. Ngɛ tovonum boovu balɩzɩ badakamwa.

Bʋwɔrɔ gɛ kʋbɔnʋ wɔɔbɔɔzi wɛ sɩsɩ baadɩlɩ wembu bʋrɔɔzɩ baalɩzɩ takamwa nɛɛ. Boo busi sɩ « aayɩ ». Nnaamʋ gɛ  kʋbɔnʋ Ahmad Diidaat wɔɔ gɔdɔɔzɩ wɛ sɩsɩ saatɩ wenki ʋsɔɔ dɛɛ tɩndʋʋ Muusa waagba Sinayi bʋʋ nɖɔ na, Ʋsɔɔ wɛɛ ŋmɛtɩna yɩ :

ʋsɔɔ sɩsɩ : Nko koduu ce. Lɩzɩ nyobopowu wa nyɔnʋvɔ ndaa. Ɖɩdaarɛ wenɖe ɖʋrɔ nyazɩŋɛɛ nɛ, Ɖɩgɛɛ ɖacɩrɩcɩrɩ ndɛ gɛ. (Exode 3 :5)

Saatɩ wenki boobo barɩŋa bɔjɔɔ kpelɔɔ kɩbɩɩzɔɔ nɖɔɔzɩ bɛbɛɛna na, ngɛ kʋbɔnʋ Diidaat waazʋlʋ wɛ nɩbaawʋ ibo ɩla alwala. Wɛɛ gɛdɛ na ngɛ waabɩsɩ bɔjɔ iferi we sɩsɩ, bɩ dɛ kɛɛ kajɩrɩtɩ rike nɖɔɔzɩ gɛ ban lam alwala nabʋnʋwa wʋrɛ ndaa, ama bʋwɛna bugutoluu caanawʋ tɔm daa :

Nna gɛ Muusa na Arʋʋna na ibiya baazam banʋʋzɩ na bɔnʋvɔ saatɩ wenki baazʋʋ siriya kɛrɛŋɛ dɛɛzɩ na saatɩ wenki bangajʋʋnaa minbarɩ na, bɩlɛ gɛ banzam nŋɩnaa wembi kewuro yiiko ndʋʋ waagagbɩɩrɩ tɩndʋʋ Muusa na. (Exode 40 :31-32)

Bɛɛzɛɛ Ʋsɔɔ bɩtɛ na, kʋbɔnʋ Diidaat waabɩsɩ bɔjɔ saatɩ wenki bɔwɛ bɛm bɛɛmɩ malɩwa mba wemba banlɩzɩɩ naafɩla jingiri daa na. Nna gɛ waabaazɩ wanlɩzɩɩ Ʋsɔɔ sɛɛdɩ ndɛɛ yaasɩ wa wenveerim wɛ. Ama bɩrɩŋa bɩdaa nyɩɩrɛ bam wɛɛ jɛ. Diidaat waajam ɩba ɩnyɩɩrɛ adɛ bɩka wenveerim wɛ sɩsɩ, « ɖɔ gɛ anɖebi wa rɩŋa wɛɛ zɛɛ Ʋsɔɔ ». Na bɩɖeezi ɩdɛɛ ŋmɛtɩrɛ nɛ, waagava tɔmbia bible ndaa :

Nna nna gɛ Ibrahiim waaba ɩnyɩɩrɛ adɛ ɩza faa na adɛ, na gɛ Ʋsɔɔ wɛɛ dɛsɩ ɩŋmatɩna yɩ, …(Génèse 17 :3)

Nna gɛ Ibrahim waazala ɩba ɩnyɩrɛ bɩka waaza ndaa ɩtekina adɛ… (Genèse 17 :17)

Muusa na Arʋʋna baalana zamʋʋ bolini bɛɖɛɛ kɛrɛŋɛ ndɛɛzɩ basala baba bɛnyɛ adɛ. Ngɛ Ʋsɔɔ waawɩlɩ wɛ igowuratɩ. (Nombre 26 :39)

Ngɛ Yusaawʋ (anɖebi) waaba ɩnyɩɩrɛɛ ʋsɔɔsɛɛdɩ ndaa. (Josué 5 :14)

 Ngɛ (anɖebi Ɩsa) wooduu bolini ɩkaba ɩnyɩɩrɛ adɛ bɩka wɛnŋmɛtɩ sɩsɩ…  (Mathieu 26 :39)

Kʋbɔnʋ Ahmad Diidaat  weeveeri zamɔɔ kɩngɩ sɩsɩ bɛm cɔɔcɩ dɩnaa na Yahuuɖuwa bʋnbɔɔzɩ boyuu batɩlɩ nŋɩnɩ taa sɩ balana ʋsɔɔ bɔwʋta kɔzɔɔ na. Tɔɔ baagʋ bana malʋwa mba dɛndɩ bɩlɛ.

Na girima gɛ  Kʋbɔnʋ Ahmad Diidaat wɔɔbɔɔzɩ wɛ sɩsɩ a paa na, nŋɩnɩ gɛ cɔɔcɩ dɩnaa ɩraa zɛɛ Ʋsɔɔ ? Barɩŋa booyoozi bobusi sɩsɩ : « wembu malʋwa mba wɛnzɛɛ na, bɩlɛ gɛ bʋʋ bɔɔzɩ bɛ sɛɛ. »

Cɔɔcɩ dɩnaa ɖabata baa zʋʋ malʋwa ndɩ na, baa va toovonum sɩsɩ lɛlɛɛɖɔ gɛ bʋjɔɔ bɛmbɛ nyazɩɩ banlam cɔɔcɩ tɩtɩndɩŋa. Ban yaa cɔɔcɩ dʋʋ naa, anɖebi Ɩsa dɛɛ sahaabi yaa ivuuru gɛ baa yaa bɩlɛ.

Tɔɔ ngbaala malʋwa mba sɩsɩ bɛmbɛ ba jʋʋna kʋ anɖebi Ɩsa bɩ kɩlɩ ? Ɖukuna laakarɩ tom tɩm tʋrɔ na ɖɩ bɛɛmɩ wenti bible wen veerim ɖaa bɩ damaana anɖebi Ɩsa na. Ɖan ganaa ada dabata ndaa sɩsɩ wɛɛ zɛɛ Ʋsɔɔ gɛ wɛmbɛm ɩ nyɩrɛ adɛ yoo. Bɩka wen zɛɛ ɩ dɛɛ sahaabi waa na alafia ndɛɛ tɔm biya ngɛ wɔn vɔkɩ fɔkɩtɩ bin leeri.

Bii yele cɔɔcɩ dɩnaa kɩbɩnaa (baala tuuba ba sʋʋ malʋwandɩ na) ɖabata waa  wɩlɩ sɩsɩ bɛmbɛ bavʋn gɛɛ malʋwa mba gɛ saatɩ bɔgɔwɛ cɔɔcɩ daa nɛ. Ama Al-Kuranɩ Girma ngʋ nda gɛ bɛmbɛ bɔɔ gɔnɩ bo yuu budoovonum. Al-kʋraanɩ bee gedirina Anɖebi kɛdɛɛzɩya nnʋ, Muhammad na.

Ô mɩya ɖeeziraa, iluu na ɩba mɩnyɛ adɛ yoo, ɩ la mʋdʋʋ bɔwʋta bɩka ɩla kifembi yoo. A Ʋsɔɔ wee disi mɩnlam kʋjʋʋ niini ndɩnaa. (Al-Kʋranɩ 22 :77)

Mɩɩna wembu andulinya na basɩm na Ʋsɔɔ rike ba damaa naa ?

Sinje kɩna, wemba barɩŋa bo voo Anɖebi Ɩsa, Anɖebi Ibrahiim na Anɖebi Muusa na, bɛɛ yɛlɩ nɩnbaawʋ. Baa jaa ɖezire naɖere baɖʋ cɔɔcɩ daa, ɖɩ damaana Anɖebi Ɩsa na. Bii yele na bɔɔ gbɔɔ yɩ baɖʋ lenle ɩlɛ ɩdɩtɩŋa ɩda ɖʋ ɩdɩ nɛ.

A mɩn jaadɩ toovonum, ʋbɔɔzɩ mɩdɩ sɩsɩ : wemba ɩba bovoo na Anɖebi Ɩsa sinje ? Nŋɩnaa wembu mɩnyɩ na, na ɖɩŋmɩɩzɩrɛ yaa na fʋʋzɩtɩ gɛ bɛn zɛɛ ʋsɔɔ nabʋnʋwa wʋrɛ ndaa bɩka banbam bɛnyɛ adɛ. Bɩlɛ na ɖan naa sɩsɩ malʋwa mba wonvuu kʋ Anɖebi Ɩsa dɛɛ ŋmɛtɩrɛ na ɩdɛɛ yaasɩ wa ndaa. Bɩka malʋwa mba naa, ʋsɔɔ weeni anɖebi Ɩsa wɛɛzɛɛ na, ɩlɛ ʋmʋ gɛ bɛlɛ ɖʋɖɔ bɛnzɛɛ. Ɩlɛ ɩnaabɩlɛ Ibrahim, Muusa na Muhammad (Ʋsɔɔ dɛɛ yaraɖa ɩtala bɔrɔɔzɩ) bɛ dɛɛ Ʋsɔɔ.

Bɩlɛ bɩ baasi, malʋwa mba ndɛɛ sɛɛdɩ bɛnzɛɛ ɖama na, bɛn zɛɛ gɛ sɩsɩ : Ʋsɔɔ dɛɛ alafia ɩtala mʋrɔ. Bɩlɛ bʋ wɔrɔ, wɛ nɛɛlɛ gɛ Anɖebi Ɩsa wɔɔ vɔkɩ wɩlɩŋa daa ; malʋwa mba urooduu (Ramadan) gɛ bɛlɛ bɔn vɔkɩ.

Kɛdɛɛzɩya naa, ɖɩ sɛɛ Ʋsɔɔ nŋɩnaa wembu anɖebi waa rɩŋa wɛɛ zɛɛ na.

Translation /Traduction:   Issofah BAH-TRAORE     Révision: Professeur Zakari TCHAGBALE

Kotokoli (Cotocoli) / Tem (Temba):  Togo , Ghana , Benin        

www.islamic-invitation.com

https://islamic-invitation.com/book_details.php?bID=2065

Download Now